阿吉師
位於士東市場嘅阿吉師，係我地係台北嘅第一餐日本野(我地係台北食左好多餐日本野)，
台北同香港一樣，隨時都好以搵到一間日本餐廳，
而呢一間阿吉師能夠吸引到我地去食，當然係有佢嘅特別之處
阿吉師特別嘅地方有以下幾個：
．無位坐，企係到食
．係街市入面，細細間
．例湯任飲
．無餐牌
當中最特別就係無餐牌，
壽司師父會問你有咩係唔想食，當你答完呢個問題，你之後會食咩就係由佢決定，
當然你仲可以決定埋用幾多錢去埋單，而佢就會根據個價錢黎去比野你食。
根據網上資料，阿吉師嘅開門時間係11:00AM，
而我地到達時間係未到11點，但去到已經見到有食緊，
可能因為太早關係，唔洗等位就有得食
食野嘅地方面前有塊木板，師父會將壽司放直接木板上面，
我地咁岩個位係個煲任飲例湯隔離，當然唔會汁輸立即試下飲啦
所謂例湯當然唔係荼餐廳見到果D啦，
呢個煲係電爐黎，會不停咁滾住，而師父就會不時咁放入魚頭魚尾同菜，
但味道我就覺得麻麻地，但其他食客就不停咁飲。
當然，主角係壽司啦
以下係我地食左嘅野
十分大隻的甜蝦(兩人份)
長腳蟹沙津(每人一大碗)
魚雜(兩人份)
吞拿魚(兩人份)
唔知咩魚(兩人份)
龍蝦，個醬好正(每人一碟)
鮑魚(每人一大隻)
勁多海膽的手卷(每人一個)
和牛(每人一件)
以上咁多野埋單NT3000
我覺得係幾值得，有龍蝦有鮑魚有和牛，而我地兩個都係食得好飽。
又到左評分時候
價錢★★★☆☆ (可平可貴，自由選擇）
環境★★★☆☆（比較日式，企位，行動不便或老人可能會唔方便）
味道★★★★★（一個字：正）
整潔★★★★☆（雖然位於街市，但街市非常整潔同有冷氣，廚放亦都很乾淨）
等候時間★★★☆☆（因為我地早去，唔需要等位，但係之後就出現左人龍，因為沒有限定進食時間，所以等候時間不詳)）
服務態度★★★★☆ (每一件壽比你嘅食壽司都會介紹一次，而語氣都係台灣人一貫地親切有禮)
建議可以十一點前去，一來少人排隊，二來街市有好多其他野睇，若果阿吉師未開門，可以周圍睇下其他野打發時間
另外預先講好預算比師父聽比較好，以免唔小心食大左超出左預算。
阿吉師(士東市場一樓88攤) 111台北市士林區士東路100號
Kommentare